«Кыргызкөмүр» ишканасы кенди иштетүүгө канча лицензия алды?
Энергетика министрлиги «Кыргызкөмүр» мамлекеттик ишканасы кендерди иштетүү жана чалгындоо үчүн канча лицензия алганын билдирди.
Ведомствонун басма сөз кызматы билдиргендей, 20 лицензия мамлекеттик ишканага өткөрүлүп берилген. 2024-жылы «Кыргызкөмүр» ишканасынын көмүр казып алуусу 1,6 миллион тоннаны түздү. Ошондой эле 11,1 млн куб метр жер кыртышын ачуу иштери жүргүзүлдү.
Энергетика министрлиги республиканын түштүгүндө жайгашкан Загара-2 жана Урмизан-3 деген эки кен иштетилгенин билдирди. Күз-кыш мезгилинде калкты арзан катуу отун менен өз убагында камсыз кылуу максатында «Кыргызкөмүр» МИ 75 отун базасы менен келишим түзгөн. Ак-Улак кенинен 80 миң тонна көмүр казылып, Бишкектин керектөөсүнө берилген.
Эске салсак, 2023-жылы мамлекеттик ишкана көмүр кендерин иштетүүгө 13 лицензия алган. «Кыргызкөмүр» ишканасы Кытай менен биргеликте Сүлүктү, Карабулак, Беш-Бурхан, Көк-Жаңгак, Тегенек, Дагара, Урмизан, Ак-Улак кендеринен катуу отун казууну пландаган.
