Кыргызстан, Тажикстан жана Өзбекстандын президенттери үч тараптуу саммит өткөрөт
31-мартта Тажикстандын Худжанд шаарында Кыргызстандын, Тажикстандын жана Өзбекстандын президенттеринин катышуусунда тарыхта биринчи жолу үч тараптуу саммит өтөт. Бул тууралуу Женевада БУУнун Адам укуктары боюнча кеңешинин 58-сессиясында сүйлөгөн сөзүндө КР министрлер кабинетинин төрагасынын орун басары Эдил Байсалов билдирди.
Эдил Байсалов БУУнун бийик трибунасынан кыргыз-тажик мамлекеттик чек ара сызыгы биротоло макулдашылганын жарыялап, бул окуяны «дипломатиянын жана саясий эрктин тарыхый салтанаты» деп атады.
«Бул Макулдашуу Кыргызстандын президенти Садыр Жапаровдун көрөгөч жетекчилигинин, анын аймактагы тынчтыкты жана туруктуулукту камсыз кылуу боюнча тынымсыз аракеттеринин аркасында мүмкүн болду. Биз эң татаал маселелер да диалог, өз ара урматтоо жана ишеним аркылуу чечиле тургандыгын далилдедик», — деп баса белгиледи Байсалов.
21-февралда Кыргызстан менен Тажикстандын ортосунда кыргыз-тажик чек арасын делимитациялоо боюнча жыйынтык протоколго кол коюлган.
Ошол эле учурда мамлекеттик чек ара боюнча келишим, энергетикалык объектилер жана суу ресурстары боюнча өкмөттөр ортосундагы макулдашуу, кесилишкен жолдорду пайдалануу жана жаңы жолдорду куруу боюнча бир катар документтер даярдалганы маалым болду.
Документтер эки өлкөнүн президенттеринин кол коюусуна даярдалды.
