Билим берүү министрлиги экиге бөлүнөбү? Министрдин жообу
Билим берүү жана илим министрлиги министрлер кабинетинен кийинки эки жылда ведомствону бөлбөөнү суранган. Бул тууралуу Жогорку Кеңештин Социалдык саясат боюнча комитетинин жыйынында министр Догдуркүл Кендирбаева билдирди.
Эске сала кетсек, үчүнчү Элдик Курултайда Жогорку Кеңештин төрагасы Нурланбек Тургунбек уулу 2025-жылы Билим берүү министрлиги бала бакчалар менен мектептерге жооп бере турган Билим берүү министрлигине жана жогорку окуу жайларды жана илимий мекемелерди көзөмөлдөй турган Жогорку билим берүү жана илим министрлигине бөлүнөрүн билдирген.
Догдуркүл Кендирбаеванын айтымында, учурда министрлик системалуу трансформациядан өтүп жаткандыктан, бөлүү жыйынтык бере албайт.
«Биздин өлкөдө 85тен ашык университет жана 1 Улуттук илимдер академиясы бар. Алардын 31и мамлекеттик жогорку окуу жайлары, эки университет — Кыргыз-Түрк «Манас» университети жана КРСУ эл аралык статуска ээ. Он бир университет толугу менен автономиялуу. Жеке менчик университеттерде биз өзүбүздүн шарттарыбызды айта албайбыз. Алардын өздөрүнүн өнүгүү программалары бар. Тогуз билим берүү мекемеси тармактык. Алар Ички иштер министрлигине, Коргоо министрлигине, УКМКга жана прокуратурага тиешелүү. Алардын өздөрүнүн ички мандаты бар. Ошондуктан, кошумча бюрократиялык институт түзүлүп жатканын эске алып, биз министрлер кабинетинен министрликтин бөлүнүшүн жок дегенде бир-эки жылга кечиктирүүнү сурандык», — деди ал.
