Атажанов: Баткенди өнүктүрүүгө бөлүнгөн каражаттар өз максатына жумшалбай жатат
Жогорку Кеңештин депутаты Ырысбек Атажанов Баткенди өнүктүрүүгө бөлүнгөн каражаттар өз максатына жумшалбай жатат деген ишенимде. Бул тууралуу ал парламенттин бүгүнкү жыйынында билдирди.
Эл өкүлүнүн айтымында, каражат бөлүнгөндөн бери бир дагы ишкана ийгиликтүү иштеген эмес.
«Өткөн жылы мен Акылбек Жапаровдон 500 миллион сом сураганымда, эгерде бул акчаны жергиликтүү жетекчилер өздөштүрө албаса, алар жоопкерчиликке тартыларын айткан. Бул сумма өз максатына жумшалбай жатат. Бир дагы ишкана ишке киришип же жемишин берген жок. Акча бөлүнөт, бирок ал жерде башаламандык болуп жатат. Министрлер кабинетинин башчысы ошондой эле комиссия жиберип, иштин жыйынтыгы боюнча маалымат берерин билдирген. Комиссия кандай жыйынтыкка келди», — деди ал.
Белгилей кетсек, «Баткен шаарынын статусу жөнүндө» мыйзамга ылайык, 2022-жылдан баштап облусту өнүктүрүүгө жыл сайын кошумча 500 миллион сом бөлүнөт.
