Мамлекеттик каржы көзөмөл кызматынын мурдагы жетекчиси Тойчубеков кармалды
Улуттук коопсуздук боюнча мамлекеттик комитеттин (УКМК) кызматкерлери өкмөткө караштуу Финансы рыногун жөнгө салуу жана көзөмөлдөө мамлекеттик кызматынын мурдагы төрагасы Юруслан Тойчубековду кармады. Маалыматты 24.kg басылмасына атайын комитеттеги булактар тастыктады.
Мурдагы аткаминер MCN Coin ишине байланыштуу 10-февралда камакка алынган. Ал каржы пирамидасын түзгөн деп айыпталууда.
Февраль айынын башында Улуттук коопсуздук боюнча мамлекеттик комитет MCN Coin виртуалдык активинин негиздөөчүлөрүнүн бири Исрадин Субанбековду кармаган. Кийинчерээк ал алдамчылыкты мойнуна алган видео жарыяланган. Анын айтымында, бир жарым жыл ичинде ишкана жарандардан 2,5 миллион доллар чогулткан. Буга чейин Финансы рыногун жөнгө салуу жана көзөмөлдөө кызматы мамлекеттик каттоодон өтпөгөн жана тиешелүү реестрлерге кирбеген MCN Coin виртуалдык активине инвестиция салууга каршы эскерткен.
Биринчи радионун түз эфиринде ИИМдин Башкы тергөө башкармалыгынын 4-башкармалыгынын кызматкери Данияр Закиров MCN Coin виртуалдык активинин негиздөөчүлөрүнүн аракетинен жапа чеккендерге 1 миллион 700 миң доллар кайтарылганын билдирди.
