ЖКда калктын аярлуу катмарына жөлөкпул алуунун жол-жобосун жөнөкөйлөтүү айтылды
Бүгүн, 29-январда Жогорку Кеңештин жалпы жыйынында депутат Марлен Маматалиев аз камсыз болгон үй-бүлөлөргө жөлөк пул алуу жол-жобосун жөнөкөйлөтүүнү суранды.
Ал Бишкектин таштанды таштоочу жайынын жанында жашаган беш балалуу жалгыз бой энеге барганын айтты.
«Ал балдарына жөлөк пул албайт. Себебин сураганда ал жардам сурап баргандыгын, бирок алар андан көп документтерди сурашкандыгын айтты. Беш баласы бар аялдын жөн эле чуркап, бул кагаздарды чогултканга убактысы жок. Социалдык коопсуздук министрлигинин кызматкерлери бул документтерди өздөрү чогултуп, электрондук версиясын сурай алышат. Эмне үчүн бул нерселерди мынчалык татаалдаштырат? — деди Маматалиев.
Депутат дагы бир аз камсыз болгон үй-бүлө эски «Жигули» унаасы бар болгондуктан жөлөк пул ала албай жатканын айтты.
«Бул унаа iPhone га караганда арзаныраак. «Макул, кымбат болсо, бирок «Жигулинин» айынан жеңилдиктерден баш тартпай эле коелу», — деди депутат.
