2024-жылы 254 адам жол кырсыгынан каза болгон. «Жөө жүргүнчү» рейд башталды
Бүгүн, 27-январда Кыргызстанда «Жөө жүргүнчү» аталышындагы масштабдуу рейд башталды. Бул тууралуу Жол кыймылынын коопсуздугун камсыздоо боюнча мамлекеттик инспекциясынын басма сөз кызматынын жетекчиси Байказы Айтикул уулу билдирди.
Анын айтымында, 2024-жылы жөө жүргүнчүлөрдү сүзүү фактылары менен коштолгон 2 613 жол кырсыгы катталап, 2 594 жаран ар кандай жаракаттарды алышкан. Тилекке каршы 254 жөө жүргүнчү көз жумган.
«2023-жылга салыштырмалуу көрсөткүчтөр кыйла азайганына карабастан, көйгөй дагы эле актуалдуу бойдон калууда. Мындай кырсыктарды алдын алуу максатында 27-январдан 1-февралга чейин Жол кыймылынын коопсуздугун камсыздоо боюнча мамлекеттик инспекциясы тарабынан «Жөө жүргүнчү» аталышындагы масштабдуу рейд жарыяланган. «Ал бүткүл республика боюнча өтөт», — дейт Байказы Айтикул уулу.
Инспекторлор уруксат берилбеген жерден жолду кесип өтүп, жолго чыгып кеткен жөө жүргүнчүлөргө 1000 сом, ал эми жөө өтмөктөрдөн жүргүнчүлөргө жол бербеген айдоочуларга 3000 сом айып салынат.
