Адылбек Касымалиев Ош облусунда турак жай комплексинин курулушу менен таанышты
Министрлер кабинетинин башчысы Адылбек Касымалиев Ош облусуна иш сапары менен барып, инвестициялык долбоорлордун жүрүшү менен таанышты. Бул тууралуу министрлер кабинетинин басма сөз кызматы билдирди.
Маалыматка ылайык, Ноокат районунда Адылбек Касымалиев курулуп жаткан гумустук органоминералдык жер семирткичтерди чыгаруучу комбинатта болду. 2024-жылы башталган долбоор 260 миллион долларга бааланып, аймактын айыл чарба тармагын өнүктүрүүдө маанилүү фактор болоорун убада кылууда.
Долбоордук кубаттуулугу жылына 500 миң тонна жер семирткичтерди чыгара турган ишкана ишке кирсе, 2 миңге жакын адам иш менен камсыз болот.
Министрлер кабинетинин башчысы ошондой эле Мамлекеттик ипотекалык компания тарабынан Ош шаарында курулуп жаткан турак-жай комплекси менен таанышты. Ал 8 блоктон жана 542 батирден турат, алар «Менин үйүм» мамлекеттик турак-жай программасынын катышуучуларына социалдык, жеңилдетилген жана жеткиликтүү ипотека жана үлүштүк курулуш механизми боюнча берилет.
