Кыргызстанда дагы эки жол акы төлөнүүчү жол пайда болушу мүмкүн
Ош жана Ноокаттагы айланма жолдор акы төлөнүүчү жолдорго айланышы мүмкүн. Бул тууралуу транспорт жана коммуникация министринин орун басары Бекназар Базаралиев маалымат жыйынында билдирди.
Аткаминер Транспорт министрлигине караштуу акы төлөнүүчү жолдор жок экенин эскертти.
«Өзүңүздөргө белгилүү болгондой, Кыргызстандагы жалгыз акы төлөнүүчү жол Өзгөн шаарынын айланасында. Анын узундугу 14 километр. Ал толугу менен бүткөрүлүп, ишке киргизилип, иштеп жатат. Дагы бир нече акы төлөнүүчү жол долбоорлору бар, мисалы, Ош жана Ноокат шаарларын айланып өтүүчү жолдор», — деди Бекназар Базаралиев.
Эске салсак, Өзгөн шаарынын айланасындагы акы төлөнүүчү жол 2024-жылдын декабрь айында ачылган. Аны бойлой жеңил унаалар 200 сомго жүрө алат. Жүк ташуучу унаалар үчүн ар кандай тарифтер бар. Маселен, эки октуу жүк ташуучу унаалардын чиркегичи жок өтүүсү 350 сом, ал эми көп тонналык унаалар үчүн 700 сом болот. Чогулган каражат жолду оңдоого жумшалат.
