Токмок шаарынын мурдагы мэри Урмат Самаев Жалал-Абадда жаңы кызматка дайындалды
Токмок шаарынын мурдагы мэри Урмат Самаев президенттин Жалал-Абад облусундагы ыйгарым укуктуу өкүлүнүн орун басары болуп дайындалды. Тиешелүү тескемеге министрлер кабинетинин төрагасы Адылбек Касымалиев кол койду.
Бүгүн, 20-январда Урмат Самаев ыйгарым укуктуу өкүлдүн иш бөлмөсүнө тааныштырылды. Ал социалдык блокту көзөмөлдөйт.
Эске сала кетсек, буга чейин Кыргызстандын Жогорку соту Урмат Самаевди КР Кылмыш-жаза кодексинин «Кызматтык абалынан кыянаттык менен пайдалануу» беренеси боюнча күнөөлүү эмес деп тапкан. Ага реабилитациялоо укугу берилген. Бул маселе боюнча соттун калган чечимдери өзгөртүүсүз калды.
Токмак шаарынын мэри 2023-жылдын 17-апрелинде кармалган. Тергөөнүн версиясы боюнча, аткаминер «Токмок жылуулук» муниципалдык ишканасында туруктуу коррупциялык схеманы уюштурууга, тактап айтканда, шаардагы жеке үйлөрдү борбордук жылуулук магистралына мыйзамсыз кошуп, андан түшкөн кирешенин бир бөлүгүн ЖЭБге чегерүүгө катышкан.
