Депутаттан алынган жерге «Кемин-Сити» турак жай комплекси курулат
Чүй облусунун Кемин районундагы жалпы аянты 353,3 гектар жер тилкеси «айыл чарба багытындагы жерлер» категориясынан «калктуу конуштардын жерлери» категориясына өзгөртүлдү. Тиешелүү буйрукка министрлер кабинетинин башчысы Адылбек Касымалиев кол койду.
Документке ылайык, бул жерге «Кемин — сити» турак-жай комплекси курулат.
Трансформация 278,28 га бакчаларга, 39,9 га жайыттарга, 2,6 га токой тилкелерине, 6,32 га каналдарга жана коллекторлорго, 2,6 га жолдорго, шосселерге жана башка жерлерге — 23,3 га тиешелүү болот.
Жергиликтүү бийлик органдарына трансформацияланган участоктун максаттуу пайдаланылышына кепилдик берүү, эгерде участок өз максаты боюнча пайдаланылбаса кийин аны баштапкы абалына келтирүү менен жерди менчик ээлеринен же пайдалануучулардан тартып алуу боюнча чараларды көрүү жана тарыхый жана маданий мурас объектилери табылган учурда аларды сактоо зарыл.
Буга чейин УКМК Кемин районундагы Жогорку Кеңештин мурдагы депутаты Нурлан Макеев мыйзамсыз менчиктештирип алган 353,3 гектар өнөр жай жерин мамлекеттин менчигине кайтарып берген.
Кийинчерээк президенттин басма сөз катчысы Аскат Алагөзов мамлекетке кайтарылган жер мамлекеттик ипотека аркылуу турак жай куруу үчүн пландалып жатканын билдирди. «Мамлекеттик ипотекалык компания» ААК (МИК) курулуш иштерин 2025-жылдын март-апрель айларында баштоону пландаштырууда.
