Кемпир-Абад иши. Айыпталуучулар жараянга сот арачыларын катыштырууну суранышты
Кемпир-Абад деп аталган кылмыш иши боюнча айыпталуучулар сот жараяндарын Бишкек шаардык сотунда сот арачыларынын катышуусунда өткөрүүнү суранышкан, бирок алар четке кагылган. Бул тууралуу саясатчы Равшанбек Жээнбеков билдирди.
Ал белгилегендей, 2025-жылдын 1-январынан тартып күчүнө кирген Жазык-процесстик кодексинин 45-беренесине ылайык, оор жана өзгөчө оор кылмыштар сот арачыларынын катышуусу менен каралат.
«Биз шаардык сотто сот процесстерин сот арачыларынын катышуусунда өткөрүүнү талап кылганбыз. Бирок прокурорлор сот залында үч судья отурганын, алар сот арачыларынын милдетин аткарып жатканын айтып, бизге макул болбой коюшту», — деди Равшанбек Жээнбеков.
Ал ошондой эле судьялар Динеев, Бекташев жана Калбаев алардын ишин жабык эшик артында кароо боюнча мыйзамсыз чечим чыгарганын кошумчалады.
Сот кийинки аптага жылдырылды.
Белгилей кетсек, 2022-жылдын 22-октябрында Кемпир-Абад суу сактагычын колдоо комитети түзүлгөн. Анын курамына активисттер, саясатчылар жана парламент депутаттары кирген. Массалык камакка алуулар 23-октябрда башталып, бийлик массалык баш аламандыкка даярданган деген айып менен 27 адамды түрмөгө жөнөткөн.
2024-жылдын 10-июнунда прокурорлор соттон бардык айыпталуучуларды «Массалык баш аламандык» беренеси боюнча 10 жылга, «Бийликти күч менен басып алуу» беренеси боюнча 15 жылга жана кылмыштардын жалпы санын кошуу менен 20 жылга кесүүнү суранган.
14-июнда райондук сот бул иш боюнча бардык айыпталуучуларды кылмыштын далилдери жок деп актаган. Прокуратура бул чечимге каршы Бишкек шаардык сотуна даттанган.
