Төө буурчак экспорттого 16 ата мекендик компания Кытайдын расмий реестрине кирди
Кыргызстандан төө буурчакты экспорттоо боюнча талаптарга жооп берген 16 ата мекендик компания Кытайдын Башкы бажы башкармалыгынын (БББ) тизмесине кирди. Бул тууралуу Суу чарба, айыл чарба жана кайра иштетүү өнөр жай министрлиги билдирди.
БББнын расмий реестри — жаныбарларды, өсүмдүктөрдү жана кайра иштетилген продукцияны экспорттоо үчүн катталган чет өлкөлүк ишканалардын тизмелерин жарыялоого арналган расмий булак болуп саналат.
Мындай кадам Кыргызстан үчүн экспорттук мүмкүнчүлүктөрдү кеңейтүүгө жана ата мекендик айыл чарба продукцияларынын эл аралык рыноктогу атаандаштыкка жөндөмдүүлүгүн жогорулатууга шарт түзөт.
«Бул жетишкендик ведомстволордун жана ишканалардын ырааттуу ишинин натыйжасы болду, Кыргызстан менен Кытайдын ортосунда айыл чарба тармагында кызматташуунун жогорку деңгээлин тастыктайт», — деп айтылат маалыматта.
Министрлик мындан ары да ата мекендик продукцияны экспорттоого колдоо көрсөтүү жана эл аралык фитосанитардык стандарттарга ылайык келүүнү камсыздоо боюнча иштерди улантат.
