Орусиядагы кыргызстандык мигранттардын саны эки эсеге кыскарды
Орусиядагы кыргызстандык мигранттардын саны эки эсеге кыскарды. Бул тууралуу тышкы иштер министри Жээнбек Кулубаев маалымат жыйынында билдирди.
Анын айтымында, Орусиянын Ички иштер министрлигинин маалыматы боюнча 2023-жылы Кыргызстандан 650 миң мигрант катталган. 2024-жылдын аягында бул көрсөткүч эки эсеге кыскарган — 350 миң адам.
«Биздин мигранттардын көбү Түркияда жана АКШда, ошондой эле Европада. Германия менен сүйлөшүүлөрдү жүргүзүп жатабыз, өлкө жумуш сунуштап жатат. Бирок ошол эле учурда чоң эмгек долбоорлорун ишке киргизүү менен кыргызстандыктарды мекенине кайтарууга аракет кылып жатабыз. Маселен, Камбар-Ата ГЭСинин курулушу башталып, анда 5 миңге жакын жумушчу орундар ачылууда», — деди ал.
Эске салсак, бир нече айга созулган маалымат жетишсиз болгондон кийин Росстат Орусиядагы эл аралык миграция боюнча статистиканы жарыялаган. Маалыматка ылайык, 2024-жылдын тогуз айында туруктуу жашоо үчүн көчүп келгендердин миграциялык өсүшү 83,5 миң адамды түздү. Бул көрсөткүч 2023-жылдын ушул мезгилине салыштырмалуу бир аз төмөн, анда өсүш 88,7 миң адамды түзгөн.
