Санарип министрлиги баңгизат жарнамалаган сайттарды сот чечими жок эле жабат
Санариптик өнүктүрүү министрлиги соттун чечими жок эле бангизат жарнамалаган сайттарды жабууну каалайт. Бул тууралуу Жогорку Кеңештин Мыйзамдуулук, укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынында санариптик өнүктүрүү министрлигине караштуу Байланыш тармагын жөнгө салуу жана көзөмөлдөө кызматынын төрагасынын орун басары Азамат Асанов билдирди.
Анын айтымында, азыр департамент мындай сайттардын ишин тез арада чектей албайт.
«Ошондуктан, соттун өкүмүн күтпөстөн порталдарды жаап салуу үчүн мыйзамдарга өзгөртүү киргизүүнү пландап жатабыз. Ички иштер министрлигинин токтомунун негизинде баңги заттарды жарнамалаган сайттардын ишмердүүлүгүнө чектөө коюуга уруксат берүүңүздөрдү суранабыз. Мыйзам долбоору келерки жылдан тарта ишке кирет», — деди Азамат Асанов.
Депутаттар Жогорку Кеңештин «Жаштар арасында баңги каражаттарын, психотроптук заттарды жана прекурсорлорду мыйзамсыз жүгүртүүгө каршы күрөшүү боюнча чаралар жөнүндө» токтомунун аткарылышы боюнча мамлекеттик органдардын маалыматын угууда.
