ЖК милицияларды видеого тартууга тыюу салган мыйзам долбоорун четке какты
Жогорку Кеңеш милиция кызматкерлери тартылган видеотасмаларды тартууга жана жайылтууга тыюу салган мыйзам долбоорун экинчи окууда четке какты.
Эске сала кетсек, мыйзам долбоорунун автору депутат Сүйүнбек Өмүрзаков. Анын айтымында, документ милиция кызматкерлери катышкан монтаждалган видеолорду, тагыраагы реалдуу окуялар бурмаланган кадрларды жарыялоого гана тыюу салат.
Депутат Бактияр Калпаев мыйзам кабыл алына электигине карабай, буга чейин МАИ кызматкерлери видеого тартууга тыюу салган учурлар бар экенин белгиледи. Ал бул мыйзам долбоору күчүнө кире электигин өздүк курамга түшүндүрүп берүүнү өтүндү.
Талкуунун жыйынтыгында четке кагылган мыйзам долбооруна депутат Дастан Бекешев да каршы пикирин билдирди. Ал добуш берүүнүн жыйынтыгын өзүнүн Telegram каналында жарыялады:
“Макул” – 44, “каршы” – 6, калыс – 33 депутат.
