«Кыргызфильм» мушкер Мунарбек Сейитбек уулу тууралуу көркөм тасма тартат
Төлөмүш Океев атындагы улуттук «Кыргызфильм» киностудиясы Парижде өткөн Олимпиада оюндарынын күмүш байге ээси, 2023-жылы бокс боюнча дүйнө чемпионатынын коло байге ээси Мунарбек Сейитбек уулу тууралуу тасма тартууну көздөп жатат.
Тасма 90 мүнөткө созулуп, Кыргызстан, Түркия жана Өзбекстандын биринчи биргелешкен кинодолбоору боло турган толук метраждуу көркөм тасма болору белгиленген.
Киностудия фильмдин синопсисине конкурс жарыялаган.
Арыздар 2024-жылдын 16-декабрынан 2025-жылдын 30-январына чейин кабыл алынат. Арызда синопсистин автору (автобиографиясы, буга чейинки эмгектери жана кинодогу жетишкендиктери) тууралуу да маалымат камтылышы керек.
Эске салсак, Парижде өтүп жаткан Олимпиада оюндарында Мунарбек Сейитбек уулу 57 килограммга чейинки салмак ченинде күмүш медаль тагынып, кыргыз боксунун тарыхында биринчилерден болуп Оюндардын медалына ээ болду.
Мунарбек Сейитбек уулу 28 жашта, ал Ош облусунун Өзгөн районунан болот. Ал сегиз жашында бокс менен машыгып баштаган. ОшМУнун дене тарбия факультетин бүтүргөн.
Синопсис — бул китептин сюжетинин кыскача мазмуну же кино сценарийинин кыскача мазмуну. Анда автор идеянын маңызын ачып, негизги сюжеттик бурулуштарды сүрөттөп, борбордук каармандарды аныктайт. Синопсис үчүнчү жак менен жазылат.
