Ала-Арча жаратылыш паркына асма жол курулушу мүмкүн
Ала-Арча жаратылыш паркына асма жол курулушу мүмкүн. Бул тууралуу президенттин иш башкармалыгынын башчысы Каныбек Туманбаев билдирди.
Анын айтымында, келерки жылы бул эс алуу аймагына 2 миң унаага ылайыкталган унаа токтотуучу жай, мейманкана жана асма жол курулат.
Каныбек Туманбаев кошумчалагандай, жаңы унаа токтотуучу жай паркка эс алганы келгендердин жеке унаалары үчүн зарыл. Эске сала кетсек, 2025-жылдан тарта мындай унаалардын Ала-Арчынын аймагына кирүүсүнө чектөө киргизилген.
Электр унаалары менен корголгон аймакты айланып өтүүгө болот.
Президенттик аппараттан билдиришкендей, экологиялык жактан таза унааларды колдонуу жаратылышка терс таасирин азайтат.
Экологиялык коопсуздуктун бардык талаптарына жооп бере турган заманбап мейманканаларды жана жаңы эс алуу үйлөрүн куруу пландаштырылууда.
«Туристтердин ынгайлуулугу үчүн сейил бактын бийик тоолуу аймактарына оңой чыгууну камсыз кылган асма жол курулат», — деп кошумчалады Каныбек Туманбаев.
Буга чейин ал «Ала-Арча» улуттук паркынын жылдык кирешеси 2022-жылдагы 51 миллион сомдон 2024-жылы 230 миллионго чейин өскөнүн билдирген.
