Сергей Пучков футбол боюнча жаштар курама команданын башкы машыктыруучусу болду
Кыргызстандын футбол боюнча жаштар курама командасынын башкы машыктыруучусу украиналык Сергей Пучков болду. Бул тууралуу Кыргызстандын футбол биримдигинин сайтында маалымдалды.
КФБнын Президенти Камчыбек Ташиев Кыргыз Республикасынын жаштар курамасынын (U-20) оюнчулары менен жолугушуп, аларды команданын жаңы башкы машыктыруучусу менен тааныштырды.
Кыргызстандын футбол союзунун чечими менен жаштар курамасынын жаңы башкы машыктыруучусу болуп украиналык адис Сергей Пучков дайындалды. Ал буга чейин «Мурас Юнайтеддин» башкы машыктыруучусу болгон.
Белгиленгендей, Сергей Пучков футболдук карьерасын аяктагандан кийин машыктыруучу катары футболдогу ишин улантып, Украинанын эмгек сиңирген машыктыруучусу наамына ээ болгон.
«Жаңы машыктыруучу менен келишим бир жылга түзүлдү. Сергей Пучковдун жетекчилиги астында Кыргызстандын жаштар курамасы 2025-жылдын февраль айында өтө турган Азия кубогуна катышат. Турнирге даярдыктар жакынкы күндөрү Ысык-Көл облусундагы машыгуу сборунда башталат», — деп айтылат маалыматта.
Сергей Пучков — советтик жана украиналык футболчу, коргоочу. «Днепр» (Днепропетровск) футболдук клубундагы оюну менен белгилүү. СССРдин чемпиону жана СССРдин кубогунун ээси. Жигердүү футболдук карьерасын аяктагандан кийин футбол боюнча машыктыруучу болгон. Украинанын эмгек сиңирген машыктыруучусу.
