Таласта милиция кызматкерлери мал уурдагандарды кармашты
Айтматов районунда укук коргоо кызматкерлери мал уурулукка шектелген эки жаранды кармашканын Талас ОИИБинин басма сөз кызматы билдирди.
Маалыматка ылайык, Айтматов райондук ички иштер бөлүмүнө жергиликтүү эки тургун кайрылып, короосунан мал уурдалганын билдиришкен. Биринчи арыздануучунун сарайынан 3-ноябрь күнү 4 кою уурдалганын, экинчи арыз ээси андан да 4 кою уурдалганын, бирок 1-декабрда болгондугун айткан. Бул фактылардын негизинде укук коргоо органдары тарабынан КР Кылмыш-жаза кодексинин «Мал уурулук» беренеси боюнча кылмыш иши козголду.
Бул кылмыштарга шектелип 2 адам кармалып, 54 жаштагы О.К. жана 26 жаштагы М.Б., алар тергөө абагына киргизилген. Укук коргоо органдарынын кызматкерлери алардын ушул сыяктуу башка кылмыштарга тиешеси бардыгын аныктап жатышат. Учурда тергөө иштери уланууда.
