Кыргызстанда мечиттер мамлекеттик органдардын уруксаты менен гана курулат
Мындан ары мечиттердин курулушу мамлекеттик органдар менен алдын ала макулдашылмакчы. Бул тууралуу Жогорку Кеңештин жыйынында Дин иштери боюнча мамлекеттик комиссиянын директору Азамат Юсупов билдирди.
Ал белгилегендей, мониторингдин жыйынтыгында мыйзамсыз иштеп жаткан 1 миңден ашык диний мекеме аныкталган. Алардын 800гө жакыны каттоодон өтсө, 120 мечит каттоодон өтө элек.
«Буга чейин мечит курулуп, андан кийин каттоодон өткөн. Эми мындай курулуштарды мамлекеттик органдар менен макулдашуу керек. Мечитке муктаждык барбы же жокпу, ошону аныктайбыз. Анан мыйзамдуу түрдө курулуш иштери жүргүзүлөт», — дейт Азамат Юсупов.
Белгилей кетсек, депутаттар «Дин тутуу эркиндиги жана диний бирикмелер жөнүндө» мыйзам долбоорун кароодо. Документтин түзүмү 6 бөлүмдөн, 40 беренеден турат.
