Аткаминерлер экологияны жакшыртууга бөлүнгөн 50 млн доллар боюнча отчет береби?
Жогорку Кеңештин жыйынында депутат Дастан Бекешев аткаминерлерден Кыргызстандагы абанын сапатын жакшыртууга бөлүнгөн 50 миллион доллар боюнча отчет берүүнү талап кылды.
«Биз Бишкектин экологиясын жакшыртуу үчүн 50 миллион доллар насыя жана грант катары алдык. Бирок түтүн дагы деле өпкөбүздү басып алат. Бизде пландар, концепциялар, кадамдык аракеттер бар. Эмне үчүн мунун баары иштебейт? Кимдир бирөө отчет берсин», — деди Дастан Бекешев.
Белгилей кетсек, үстүбүздөгү жылдын май айында президент Садыр Жапаров Эл аралык өнүктүрүү ассоциациясынан (Дүйнөлүк банктын тобуна кирген) Кыргыз Республикасындагы абанын сапатын жакшыртуу үчүн 50 миллион доллар өлчөмүндө насыя бөлүүнү жактырган.
Акчаны төмөнкү максаттарга пайдалануу сунушталган:
абанын сапатын көзөмөлдөөчү автоматташтырылган станцияларды куруу жана модернизациялоо аркылуу абанын сапатын башкаруу системасын чыңдоо;
абанын сапатын текшерүү үчүн химиялык лабораторияны жаңылоо;
абанын сапатын контролдоо жол-жоболорун күчөтүү боюнча техникалык жардам;
абанын сапатын болжолдоо жана эскертүү ыкмалары;
жеке үйлөрдө таза жылытуу технологияларын киргизүүгө көмөктөшүү;
Бишкек шаарынын жашылдандыруусунун туруктуулугун камсыз кылуу үчүн ирригациялык системаларды куруу.
Долбоор 2030-жылдын декабрына чейин Жаратылыш ресурстары, экология жана техникалык көзөмөл министрлиги жана Каржы министрлиги тарабынан тиешелүү мамлекеттик органдар, Гидрометеорология кызматы, Бишкек шаарынын мэриясы, коммерциялык банктар жана башка негизги кызыкдар тараптар менен тыгыз кызматташтыкта ишке ашырылат.
