Бишкекте коомдук транспортко акы төлөбөгөндөр айып пулга тартылат
Эми коомдук транспортто акы төлөбөгөндөр (коёнектер)айып пулга тартылат. Бул тууралуу Бишкек мэриясы билдирет.
Транспорт жана жол-транспорт инфраструктурасын өнүктүрүү башкармалыгынын кызматкерлери Жол кыймылынын коопсуздугун камсыздоо боюнча мамлекеттик инспекциясы жана Бишкек шаардык транспорт муниципалдык ишканасы менен биргеликте коомдук транспортто рейд жүргүзүп, жүргүнчүлөр жол кире акысын төлөп жатканын текшеришет.
Жол кирени төлөбөй коюу фактылары аныкталса, жүргүнчүлөргө Кыргыз Республикасынын колдонуудагы мыйзамдарынын чегинде айып салынат.
Белгилеп кетсек, Кылмыш-жаза кодексинин 199-беренесинин 8-пунктуна ылайык, муниципалдык коомдук транспортто жол жүрүү акысын жана багажды төлөбөй коюу, ошондой эле шаардык коомдук транспортто пайдалануу эрежелерин бузуу жеке жактарга айып салууга алып келет. 10 эсептик көрсөткүч (1 миң сом) өлчөмүндө айып пулга тартылат.
