Бишкектин Биринчи Май райондук соту Кой-Таш окуясы боюнча кылмыш ишин кароону улантты.

Бүгүн, 5-декабрда УКМКнын мурдагы жетекчиси Орозбек Опумбаевдин жактоочусунун өкүлү сот отурумун жабык өткөрүү өтүнүчү менен кайрылды. Белгилей кетсек, Опумбаев өзү күбө катары сурак берип жатат. Ал бул процедуранын ЖМК өкүлдөрүнүн катышуусуз өтүшүн билдирди. Аны мамлекеттик айыптоочу колдоду.

Сот бул өтүнүчтү канааттандыруудан баш тартты. Буга чейин ал журналисттерге тасмага жана сүрөткө тартууга уруксат берген.

Эске сала кетсек, УКМКнын мурдагы жетекчиси Орозбек Опумбаев биринчи жолу 2-декабрда коомчулукка чыккан. Ал Кой-Таштагы башаламандык боюнча Биринчи Май райондук сотуна келген. Опумбаев 2019 жана 2020-жылдагы Кой-Таш жана Октябрь окуялары боюнча журналисттерге комментарий берген жок.

2020-жылдын 5-октябрынан 6-октябрына караган түнү Бишкекте болгон тополоңдон кийин кылмыш иши козголгон. УКМК менен ИИМдин мурдагы жетекчилери Орозбек Опумбаев менен Кашкар Жунушалиев кызматтан кетип, өздүк курамын таштап кетишкен. Экөө тең издөөгө алынганы, бирок тергөөчүлөр алардын кайда экени тууралуу маалыматы жок экени айтылган.

2019-жылдын 7-августунда УКМКнын атайын күчтөрү Алмазбек Атамбаевдин Кой-Таштагы резиденциясына басып кирүүгө аракет кылган. Эртеси күнү ИИМ менен УКМКнын биргелешкен күчтөрү резиденциянын ээсин кармоо боюнча кезектеги атайын операция жүргүзүштү. Күч түзүмдөрү Алмазбек Атамбаевди Кой-Таштан алып чыгууга жетишти. Колдоочулар коопсуздук күчтөрүнө таш ыргытып, дөңгөлөктөрдү жана таштандыларды өрттөй башташты. Эки күндөн бери болгон кагылышууда 136 адам жарадар болуп, атайын күчтөрдүн бир жоокери октон каза болгон.