Кыргызстан менен Беларусь түз аба каттамдарын ачууну көздөп жатат
Кыргызстан менен Беларусь эки өлкөнүн ортосунда түз аба каттамдарын ачууну көздөп жатат. Бул тууралуу тараптар Бишкекте өткөн соода-экономикалык, илимий-техникалык жана маданий кызматташтык боюнча өкмөттөр аралык комиссиянын жыйынында айтышты.
Тараптар алгач тар чөйрөдө — министрлер кабинетинин төрагасынын орун басары Бакыт Төрөбаев менен Беларустун вице-премьер-министри Анатолий Сивак менен сүйлөшүүлөрдү жүргүзүштү.
Теңтөрагалар комиссия эки тараптуу өнөктөштүктүн кеңири тармагын илгерилетүүнүн жана биргелешкен өз ара пайдалуу долбоорлорду ишке ашыруу үчүн шарттарды түзүүнүн маанилүү механизми экенин белгилешти. Алар Кыргыз Республикасы менен Беларустун ортосундагы көп тараптуу кызматташтыкты мындан ары өнүктүрүүгө даяр экендиктерин ырасташты.
Минск менен Бишкектин ортосунда түз аба каттамдарын калыбына келтирүү маселеси талкууланды. Өткөн жылы Кыргызстанга Беларустун 5 миңге жакын жараны келсе, быйылкы жылдын сегиз айында 4 миңден ашык адам келген.
Маданий-гуманитардык чөйрөдө диалогду тереңдетүү жана билим берүү жана саламаттыкты сактоо тармактарындагы өз ара аракеттенүүнү сапаттык жаңы деңгээлге чыгаруу боюнча биргелешкен күч-аракеттерди көрүү зарылчылыгы белгиленди.
