Быйыл Кыргызстанда өзгөчө кырдаалдардан келтирилген зыян 1,3 млрд сомду түздү
2024-жылдын башынан бери Кыргызстанда өзгөчө кырдаалдардан келтирилген зыян 1 миллиард 340 миллион сомго жетти. Бул тууралуу Өзгөчө кырдаалдар министринин биринчи орун басары Азамат Мамбетов билдирди.
Анын айтымында, өлкөдө 130га жакын ири өзгөчө кырдаалдар болуп, анда 67 адам каза болуп, материалдык чыгым миллиард сомдон ашык болгон. Жалпысынан республика боюнча 2 миң 500гө жакын өзгөчө кырдаал катталды, анын ичинде өрт, жол кырсыктары жана сууда сүзүү коопсуздугуна байланыштуу кырсыктар.
Бүгүнкү күндө каза болгондордун саны 251 адамды түзөт. Материалдык чыгымдын негизги бөлүгү селден улам келип, 22 жаран каза болуп, 1 миллиард 250 миллион сомдук чыгым келтирилген.
Өзгөчө кырдаалдар министрлиги өзгөчө кырдаалдардын кесепеттерин жоюу үчүн техникаларын жаңылоону улантууда. Быйыл өрт өчүрүүчү унаалар, инженердик жана аэротехникалар жаңыланып, өрт кырсыгынын кесепеттерин 50 пайызга кыскартууга жардам берди. Мурда эски техника 2-4 тонна суу ташыса, жаңы техника 6-8 тонна сууну батат, бул өрттү тезирээк өчүрүүгө жана анын жайылышын чектөөгө мүмкүндүк берет.
