Нурдан Орунтаев Бишкектеги Хрущев жана Сталин учурундагы имараттарды буздурабы?
Мамкурулуштун жетекчиси Нурдан Орунтаев Бишкектеги Хрущев жана Сталин учурундагы имараттарды бузууну көздөөдө. Бул тууралуу ал Биринчи радиого билдирди.
Тиешелүү мекеменин жетекчисинин айтымында, СССР убагында курулган эски имараттарды бузуу пландалууда. Муну ал борбор калаада курулуш үчүн жер тилкелеринин кескин жетишсиздиги менен түшүндүрдү.
«Эски үйлөр көп жерди ээлейт, бирок батирлер аз. Аларды бузуп, көп кабаттуу үйлөр курулса, турак жай аянты геометриялык түрдө көбөйөт. Бул замандын талабы, бул оңдоп-түзөө деп аталат», — дейт Нурдан Орунтаев.
Ошондой эле Мамкурулуш 2025-жылдын январь айынын аягына чейин мыйзамсыз курулган коммерциялык объектилерге чара көрүүнү пландоодо. Алар мыйзам бузуу менен курулуп, жарандарга ыңгайсыздык жаратууда.
Башкармалыктын башчысы муну мажбурлоо чарасы деп атады. Ал кошумчалагандай, азыр атайын түзүлгөн комиссия бузула турган объектилердин санын тактап жатат. Анын жыйынтыгы боюнча демонтаждоо боюнча акыркы чечим кабыл алынат.
