Тарых музейинде венгер саймаларынын көргөзмөсү ачылды
Искусство күнүнүн алкагында Венгриянын Бишкектеги элчилиги Улуттук тарых музейинде Венгриянын матио саймаларынын уникалдуу көргөзмөсүн тартуулады. Иш-чаранын конокторуна музейдин директору Жылдыз Бакашова жана Венгриянын Бишкектеги атайын жана ыйгарым укуктуу элчиси Шандор Дороги сөз сүйлөштү.
«Элдик искусство элдин рухун, философиясын чагылдырат деп эсептейбиз жана бул демилге биздин жакшы салтыбызга айланат деп ишенебиз», — деди элчи.
«Коноктор венгердик салттуу искусство жана кол өнөрчүлүк дүйнөсүнө кызыктуу саякат жасоого мүмкүнчүлүк алышты. Көргөзмөнүн кураторлору музейге келгендер үчүн интерактивдүү экскурсия уюштуруп, аларды венгриялык матио саймаларынын бай мурасы менен тааныштырышты. Көргөзмөдө саймалуу полотнолордун жана кийимдердин жана тиричилик буюмдарынын жаркын үлгүлөрү, ошондой эле венгер элинин жашоосу жана каада-салты тууралуу баяндаган архивдик фотосүрөттөрдүн коллекциясы коюлган», — деп айтылат маалыматта.
Көргөзмө үчүн материалдар Мезековесддеги Матё музейи, ошондой эле жеке коллекционерлер тарабынан берилген. Долбоор Венгрия менен Кыргыз Республикасынын ортосундагы маданияттар аралык алмашуунун бир бөлүгү болуп саналат жана эки өлкөнүн элдик салттарындагы окшоштуктарды көрсөтүүгө, ошондой эле маданий идентификацияны калыптандыруунун маанилүү элементи катары кол өнөрчүлүктүн маанисин тереңдетүүгө багытталган.
Көргөзмө 2024-жылдын 24-ноябрына чейин уланат.
