Токмокто баасы 5 миллиард сомдон ашык турган завод мамлекетке кайтарылды
Атайын кызмат Токмоктогу 5 миллиард 855 миллион сомду түзгөн «Железобетон» акционердик коомун мамлекетке кайтарды. Бул тууралуу Улуттук коопсуздук боюнча мамлекеттик комитеттин басма сөз борборунан билдиришти.
Маалыматка ылайык, ААКнын 40 пайыз акциясы мамлекетке таандык экени, бирок бул үлүш негизги акциялар пакетинин ээси В.П.нын тарапташтарына мыйзамсыз берилгени жана жеке менчикке толугу менен менчиктештирилгени аныкталган.
«Мамлекеттик мүлк фондунун 1992-жылдын 22-декабрындагы токтому менен «Железобетон» кооперативдик комбинаты сметалык баасы 38 миллион 264 миң рубль болгон ачык акционердик коомго айландырылган. 1993-жылы Мамлекеттик мүлк фондуна электр тармактарын куруу менен алектенген чет өлкөлүк ишканалардын биринен «Железобетон» ААКсынын мамлекеттик үлүшүнөн 28 миллион 698 миң сомдук 15 пайыз акциясын сатып алуу боюнча арыз түшкөн, бирок документтештирилген маалымат жок. Бул каражаттардын мамлекеттик бюджетке түшүүсү», — деп айтылат маалыматта.
Атайын кызмат 1992-жылдан бүгүнкү күнгө чейин мамлекеттик акциялар пакетинин калган 25 пайызын Мамлекеттик мүлк фондунун көзөмөлүндө болбогонун, башкача айтканда, мамлекет «Железобетон» ААКсынын пайдасынан эч кандай дивиденд албаганын белгиледи.
Аткарылган иштердин жыйынтыгында негизги акционер В.П. объектти өз ыктыяры менен мамлекеттин балансына өткөрүп берген.
