ЖК депутаты маанилүү дары-дармектерге кошумча нарк салыгын алып салууну суранды
Жогорку Кеңештин Мыйзамдуулук, укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынында депутат Айсулуу Мамашова экономика жана коммерция министри Данияр Амангелдиевге өтө маанилүү дары-дармектерге кошумча нарк салыгын алып салууну суранды.
Ал белгилегендей, мындай дарыларга кошумча нарк салыгы онкологиялык оорулууларга терс таасирин тийгизет.
«Онкоспар деген дары бар. Ага 120 миң сом сарпталган. Быйыл анын баасы 200 миңге көтөрүлдү. 12 пайыздык КНС киргизилгенден кийин 224 миң сом турат. Фармацевтикалык компаниялар, билесиздер, бул суммага дагы кошумчалайт, анткени алар да пайда көргүсү келет. Дары эле 224 миң сом болсо, аны Кыргызстанда ким көтөрөт?», — деди Айсулуу Мамашова.
Ал ошондой эле балдардын рак оорусун дарылоо үчүн 23 дары керек экенин айтты. Анын ичинен үчөө гана мамлекеттик бюджеттин эсебинен сатылып алынат. Калган 20 ата-эне өз эсебинен сатып алууга аргасыз.
Данияр Амангелдиев кошумча нарк салыгынан бюджеттин болжолдонуп жаткан кирешелеринин жалпы көлөмү 4 миллиард 200 миллион сомду түзөт деп жооп берди. Анын 1,8 миллиарды эң керектүү дары-дармектерди жана гемодиализди сатып алууга бөлүнгөн. Ошол эле учурда ал парламентарийдин сунушун кароого даяр экенин билдирди.
