Евробиримдик Кыргызстандын билим берүү тармагына 7 миллион евро бөлдү
Евробиримдик билим берүү тармагына гранттык негизде Кыргызстанга 7 миллион евро (648,7 миллион сом) бюджеттик жардам которду. Бул тууралуу Билим берүү министрлигинин басма сөз кызматы билдирди.
Маалыматка ылайык, Евробиримдиктин колдоосу Кыргыз Республикасындагы мектепте билим берүүнүн сапатын жогорулатууга жана анын жынысына, улутуна жана тилине карабастан бардык балдар үчүн жеткиликтүүлүгүн камсыздоого багытталган.
«Европа Биримдиги менен Министрлер Кабинетинин биргелешкен аракеттери билим берүү системасы сунуш кылган көндүмдөрдү жана квалификацияларды эмгек рыногунун жана заманбап демократиялык коомдогу жашоонун муктаждыктарына шайкеш келтирүүгө багытталган», — деп билдирди министрлик.
Евробиримдиктин жардамы Билим берүү жана илим департаментинин илим, технология, инженерия жана математика (STEM) чөйрөлөрүндөгү ишин колдоого, атап айтканда санариптик сабаттуулукту, медиа сабаттуулукту жана жашыл көндүмдөрдү жайылтууга багытталган. Максаты студенттердин келечектеги жашоосуна натыйжалуу даярданууга жардам берүү.
«7 миллион евро өлчөмүндөгү транш 2023-2026-жылдар аралыгында Кыргыз Республикасында билим берүүнү өнүктүрүү стратегиясын ишке ашыруу үчүн Европа Биримдиги тарабынан бөлүнгөн 27 миллион евронун алкагындагы экинчи төлөм», — деп айтылат министрликтин маалыматында. Билим берүү тармагында ЕБ биздин өлкөдө жүргүзүлүп жаткан билим берүү тармагындагы реформалардын негизги өнөктөштөрүнүн бири экенин кошумчалады.
