Кыргызстанда 3 миллион 552 миң 582 шайлоочу 2021-жылдын 10-январына дайындалган мөөнөтүнөн мурун президентти шайлоо жана референдумга катыша алат. Бул тууралуу кереге кеңешке катышып жаткан Боршайкомдун төрайымы Нуржан Шайлдабекова билдирди.

Айтымында, бул 14-декабрга карата түзүлгөн тизмеден алынган маалымат.

Нуржан Шайлдабекова билдиргендей, ал тизмеге өзгөртүүлөр 29-декабрга чейин киргизилет. Белгилей кетсек, бул шайлоодо № 2 формасы колдонулбайт, ошондуктан шайлоочулардын саны да кыскарды. Шайлоочулардын басымдуу көпчүлүгү — 726 миң 311 адам Ош облусунда катталды.

Чет өлкөлөрүндө 35 миң 575 шайлоочу катталды.

Нуржан Шайлдабекованын берген маалыматына ылайык, чет өлкөлөрүндө № 2 формасы колдонулмакчы.

Эске салсак, бүгүндөн тарта үгүттөө кампаниясы башталды. Ал 2021-жылдын 8-январында саат 8:00дө аяктайт.