Бишкек шаарынын аймагына кайрадан өзгөчө абал режими киргизилди. Бул тууралуу президенттин аппаратынын маалыматтык саясат бөлүмү билдирет.

Жогорку Кеңеш үч күндүн ичинде борбор калаанын аймагында буга чейин өзгөчө абал режимин киргизүү жөнүндө маселени карабагандыктан, президент кайра дагы жарлык чыгарды.

Ага ылайык Бишкек шаарынын аймагында 2020-жылдын 12-октябрынан саат 20.00дөн баштап 2020-жылдын 19-октябрына саат 07.00гө чейин өзгөчө абал киргизилет. Комендант болуп Алмазбек Орозалиев дайындалды.

Белгилей кетсек, президент өз жарлыгы менен өзгөчө абал тартибин киргизе алат. Жарлык чыгышы менен күчүнө кирет. Аны парламент үч күн ичинде карап чыгышы шарт. Эгер депутаттар жарлыкты үч күн ичинде карабаса, ал күчүн жоготот.