Жогорку Кеңештин депутаттары октябрь айына чейин пленардык жыйындарды токтотконуна карабастан айлык алышат. Бул тууралуу 24.kg агенттигине парламенттин басма сөз катчысы Ибраим Нуракун уулу билдирди.

Анын айтымында, алтынчы чакырылыштагы депутаттардын ыйгарым укуктары Жогорку Кеңештин жетинчи чакырылышындагы эл өкүлдөрү шайланганда аяктайт.

«Депутаттар жеринде шайлоочулар менен жолугуп жүрүшү, алардын эмгек акысын төлөбөй койсо болот деген туура эмес. Алардын аймактадагы иши «Депутаттын макамы жөнүндө» мыйзамы менен жөнгө салынат. Сентябрь айынын айлыгынан алар өз ыктыяры менен албай койсо деле болот. Шайлоочулар менен жолугуу учурунда эмгек акы төлөнбөйт деген ченем мыйзамда жок», — деди ал.

Эске салса, Жогорку Кеңештин депутаттары 2-октябрга чейин парламент жыйындарына чогулбоо чечимин кабыл алышкан.