Билим берүү жана илим министрлигинин кадимки режимде окууну калыбына келтирүүнүн бир нече варианты бар. Бул тууралуу мекеме жетекчисинин орун басары Надира Жусупбекова «Ала-Тоо-24» эфиринде билдирди.

Айтымында, кырдаал турукташканда, биринчи кезекте 5инчи, 9унчу жана 11-класстарынын окуучулары кадимки режимге кайтып келмекчи.

Дагы бир план боюнча, биринчилерден болуп 2-класстын окуучулары сабагын баштап, андан кийин мектеп 5, 9 жана 11-класстын окуучулару үчүн ачылат.

«Экинчи класстын окуучулары бир гана жыл окуду, аны толук бүтүрүп, аягына чыгышкан жок. Ал эми 9 жана 11-класстын окуучулары бүтүрүүчүлɵр. Булар кадимки режимде кɵбүрɵɵк окушса, бүтүрүү сынагына жакшыраак даярданышмак. 5-класс — жогорку класстын окуучуларына кадам шилтеген балдар, буларга ар түрдүү мугалимдер сабак ɵтɵ баштайт, ошондуктан булар бир аз кыйналып калышы мүмкүн», — деди ал.

Эң негизгиси — балдардын, ата-энелер жана мугалимдердин коопсуздугу экенин баса белгиледи министрдин орун басары.

Белгилей кетсек, бүгүн мектепке 1-класстын окуучулары гана барышты. Андан жогорку класстар азырынча онлайн окушат. Билим берүү жана илим министрлиги 1-чейректе окуучулар аралыктан окууну улантарын маалымдаган.