Москвада кыргыз-тажик ортосундагы массалык мушташтын катышуучулары кармалды. Бул тууралуу ИИМдин басма сөз кызматы маалымдады.

Анын айтымында, 21-июлда кыргыз жана тажик улутундагы жарандар коомдук жайда мушташып кетишкен. Натыйжада милиция кызматкерлери 18 катышуучуну кармаган.

«Бул факт боюнча «Бейбаштык» беренесинин негизинде кылмыш иши козголду. Мындан сырткары, кыргыз жактан дагы, тажик тараптан дагы мушташка катыштыгы бар жарандардын мессенджерлер аркылуу жөнөткөн баяндамаларын текшерүү жүрүп жатат», — деп берилет маалыматта.

Эске сала кетсек, Екатеринбург шаарында өткөн дем алыш күндөрү кыргыз-тажик ортосунда уруш чыккан. Окуядан кийин социалдык тармактарда өзгөчө «WhatsApp» тиркемесинде группалар ачылып, кыргыз жарандары тарабынан тажиктерге каршы чакырыктар айтыла баштаган.