«Саламаттык сактоо министрлигине коронавирус илдетине карата чет мамлекеттер, эл аралык өнөктөштөр жана жөнөкөй жарандар гуманитардык жардам берип жатышат. Бул гуманитардык жардамды бөлүштүрүү үчүн Министрликтин буйругу менен атайын комиссия түзүлгөн», — деп билдирди Саламаттык сактоо министрлигинин статс-катчысы Калысбек Шадыханов.

Анын айтымында, келип түшкөн жардам медициналык жабдуулар, дары-дармектер жана медициналык маанидеги буюмдардын 25 аталышын камтыйт.

«Бул убакыттын ичинде, биз 11 чет мамлекеттен жардам алдык, алар: Азербайжан, Кытай Эл Республикасы (КЭР), Түркия, Катар, Бириккен Араб Эмираттары, Түштүк Корея, Швейцария, Иран, Өзбекстан, Россия, Америка Кошмо Штаттары. Андан сырткары, жергиликтүү жана эл аралык 65 уюмдан гуманитардык жардам келип түшкөн. Алардын арасында: БУУ системасындагы уюмдар, ПРООН, ТIKA, Алтын Кен, «Нурлуу кайрымдуу кыздар» коомдук фонду жана башкалар бар», — деп кошумчалады Калысбек Шадыханов.

Ал ушундай оор мезгилде кыргыз элине жардам көрсөткөн өнөктөштөргө жана жарандарга терең ыраазычылык билдирип, бул колдоо — баа жеткис экенин белгиледи.